26.9 C
Kollam
Tuesday, May 17, 2022
spot_img

വയനാട്ടിലേക്ക് സഞ്ചാരികളുടെ ഒഴുക്ക് ; 2 മാസത്തിനിടയില്‍ എത്തിയത് ഒന്നരലക്ഷം പേർ

സുല്‍ത്താന്‍ ബത്തേരി: നീണ്ട ഇടവേളക്ക് ശേഷം വയനാട്ടിലെ വിനോദസഞ്ചാര മേഖല തുറന്ന് രണ്ട് മാസം പിന്നിടുമ്പോള്‍ ജില്ലയിലെത്തുന്ന വിനോദസഞ്ചാരികളുടെ എണ്ണത്തില്‍ വന്‍വര്‍ധന. കൊവിഡ് വ്യാപനവും, അതിനെ തുടര്‍ന്നുള്ള നിയന്ത്രണങ്ങളുടേയും ഭാഗമായി അടച്ചിട്ട ടൂറിസം കേന്ദ്രങ്ങള്‍ ഒന്നൊന്നായി തുറന്നതോടെയാണ് വീണ്ടും വയനാട് സഞ്ചാരികളുടെ ഇഷ്ടകേന്ദ്രമായി മാറിയിരിക്കുന്നത്. കോവിഡ്  മാനദണ്ഡങ്ങള്‍ പാലിച്ചുകൊണ്ട് ആയിരക്കണക്കിന് സഞ്ചാരികളാണ് ജില്ലയിലെ ത്തുന്നത് ആഴ്ചകള്‍ക്ക് മുമ്പ് പൂക്കോട് തടാകവും, ഗാന്ധിജയന്തി ദിനത്തില്‍ കുറുവാ ദ്വീപും തുറന്നതും വയനാട്ടിലെ വിനോദസഞ്ചാര മേഖലക്ക് പുത്തനുണര്‍വാണ് നല്‍കിയിരിക്കുന്നത്. ജില്ലാ ടൂറിസം പ്രൊമോഷന്‍ കൗണ്‍സിലിൻ്റെയും, വനം വകുപ്പിന്റെയും, കെഎസ്ഇബിയുടെയും, ജലസേചന വകുപ്പിൻ്റെയും നിയന്ത്രണത്തിലുള്ള ടൂറിസ്റ്റ് കേന്ദ്രങ്ങളിലെല്ലാം നിലവില്‍ സഞ്ചാരികള്‍ക്ക് പ്രവേശനം അനുവദിച്ചിട്ടുണ്ട്. കഴിഞ്ഞ രണ്ടുമാസത്തിനിടയില്‍ ഒന്നരലക്ഷം സഞ്ചാരികള്‍ വയനാട്ടിലെത്തിയതായാണ് കണക്കുകള്‍. 70 ലക്ഷത്തോളം രൂപയുടെ വരുമാനമാണ് ടിക്കറ്റ് ഇനത്തില്‍ മാത്രം ഇക്കാലയളവില്‍ ലഭിച്ചത്. തുറന്നിട്ട് കുറച്ച് ദിവസങ്ങളെ ആയുള്ളുവെങ്കിലും വയനാടിന്റെ കവാടത്തിനരുകില്‍ സ്ഥിതി ചെയ്യുന്ന പൂക്കോട് തടാകത്തിലാണ് ഏറ്റവുമധികം ആളുകളെത്തിച്ചേര്‍ന്നത്. മുപ്പതിനായിരത്തിലേറെ പേരാണ് ഇവിടെ കുറഞ്ഞ ദിവസം കൊണ്ട് സന്ദര്‍ശനം നടത്തിയത്. രണ്ടാമത് സഞ്ചാരികളെത്തിയത് കാരാപ്പുഴ അണക്കെട്ടിലാണ്.പൂക്കോട് തടാകത്തില്‍ നിന്നും ചെളിനീക്കം ചെയ്ത് കൂടുതല്‍ മനോഹരമാക്കിയതിന് പിന്നാലെയായിരുന്നു സഞ്ചാരികള്‍ക്ക് തുറന്നുകൊടുത്തത്. കാരാപ്പുഴയിലും ഒട്ടേറെ നവീകരണപ്രവൃത്തികളാണ് നടത്തിയത്. പൂക്കോട് തടാകവും, കാരാപ്പുഴ അണക്കെട്ടും കഴിഞ്ഞാല്‍ സഞ്ചാരികളുടെ ഇഷ്ടസ്ഥലം ചരിത്രവുമായി ഇഴ ചേര്‍ന്നുകിടക്കുന്ന എടക്കല്‍ ഗുഹയാണ്. ചരിത്രാന്വേഷകരും, വിദ്യാര്‍ഥികളുമടക്കം ഇരുപതിനായിരത്തിലേറെ പേരാണ് രണ്ട് മാസക്കാലത്തിനിടയില്‍ എടക്കല്‍ ഗുഹ സന്ദര്‍ശിച്ചത്. കാന്തന്‍പാറ വെള്ളച്ചാട്ടം കാണാനും ഇരുപതിനായിരത്തിലേറെ പേര്‍ ഇക്കാലയളവില്‍ ജില്ലയിലെത്തി. മാവിലാംതോട് പഴശി ലാൻഡ് സ്‌കേപ്പ് മ്യൂസിയം, ചീങ്ങേരിമല, കര്‍ലാട് തടാകം, ബത്തേരി ടൗണ്‍ സ്‌ക്വയര്‍ എന്നിങ്ങനെ ജില്ലയിലെ മറ്റ് വിനോദസഞ്ചാര കേന്ദ്രങ്ങളിലും ആയിരക്കണക്കിന് പേരാണ് പ്രവേശനം അനുവദിച്ചതിന് ശേഷം എത്തിച്ചേര്‍ന്നത്.കടുത്ത പ്രതിസന്ധി നേരിട്ട വിനോദസഞ്ചാര മേഖലക്ക് സഞ്ചാരികള്‍ എത്തിത്തുടങ്ങിയതോടെ പുത്തനുണര്‍വാണ് കൈവന്നിരിക്കുന്നത്. ജില്ലയിലെ റിസോര്‍ട്ടുകള്‍, ഹോംസ്‌റ്റേകള്‍, റെസ്‌റ്റോറൻ്റുകള്‍, ടാക്‌സി വാഹനങ്ങള്‍ എന്നിവക്കെല്ലാം വിനോദസഞ്ചാര മേഖലയിലെ ഉണര്‍വ് ആശ്വാസമായിരിക്കുകയാണ്. ശനി, ഞായര്‍ ദിവസങ്ങളിലാണ് ഏറ്റവുമധികം സഞ്ചാരികള്‍ ജില്ലയിലേക്കെത്തുന്നത്. ടൂറിസ്റ്റ് കേന്ദ്രങ്ങളോട് അനുബന്ധിച്ചുള്ള റിസോര്‍ട്ടുകളിലും, ഹോംസ്‌റ്റേകളിലും അവധിദിവസങ്ങളില്‍ മുന്‍കൂട്ടി ബുക്ക് ചെയ്യുന്നവരുടെ എണ്ണവും വര്‍ധിച്ചിരിക്കുകയാണ്. ടൂറിസ്റ്റ് കേന്ദ്രങ്ങളോട് അനുബന്ധിച്ച് പ്രവര്‍ത്തിച്ചുവന്നിരുന്ന ചെറുകിട കച്ചവടക്കാരും കടുത്ത പ്രതിസന്ധിയിലായിരുന്നു. ടൂറിസ്റ്റ് കേന്ദ്രങ്ങള്‍ തുറന്നതോടെ ഇവരും ആശ്വാസത്തിലാണ്.അടച്ചിട്ടിരുന്ന സമയത്ത് ഒട്ടുമിക്ക ടൂറിസ്റ്റ് കേന്ദ്രങ്ങളിലും നവീകരണ പ്രവൃത്തികളടക്കം നടത്താന്‍ സാധിച്ചുവെന്നതും നേട്ടമാണ്. സഞ്ചാരികള്‍ക്ക് ആവശ്യമായ സൗകര്യങ്ങളും ഇന്ന് ഒട്ടുമിക്ക ടൂറിസ്റ്റ് കേന്ദ്രങ്ങളോടും അനുബന്ധിച്ചുണ്ട്. രാമായണ സര്‍ക്യൂട്ട് പോലുള്ള ടൂറിസം പദ്ധതികളും, തീര്‍ഥാടന ടൂറിസം പദ്ധതികളുമെല്ലാം പ്രാവര്‍ത്തികമായാല്‍ സഞ്ചാരികളുടെ വന്‍ പ്രവാഹം തന്നെ വയനാട്ടിലേക്കുണ്ടാകുമെന്നാണ് പ്രതീക്ഷിക്കപ്പെടുന്നത്. വയനാടിനോട് ചേര്‍ന്നുകിടക്കുന്ന തമിഴ്‌നാട്ടിലെ നീലഗിരിയിലും സഞ്ചാരികളുടെ എണ്ണത്തില്‍ വന്‍വര്‍ധനവാണ് ഉണ്ടായിരിക്കുന്നത്.കൊവിഡ് നിയന്ത്രണങ്ങളില്‍ ഇളവുകള്‍ പ്രഖ്യാപിച്ചു ഓഗസ്റ്റ് 23 മുതല്‍ ടൂറിസ്റ്റ് കേന്ദ്രങ്ങള്‍ തുറന്നതോടെയാണ് ഊട്ടിയടക്കമുള്ള വിനോദസഞ്ചാര കേന്ദ്രങ്ങളിലേക്ക് സഞ്ചാരികളെത്തി തുടങ്ങിയത്. നീലഗിരിയിലേക്ക് ദിനേന രണ്ടായിരത്തിന് മുകളില്‍ സഞ്ചാരികളാണ് എത്തിക്കൊണ്ടിരിക്കുന്നത്. വെള്ളി, ശനി, ഞായര്‍ ദിവസങ്ങളില്‍ സഞ്ചാരികളുടെ എണ്ണത്തില്‍ വന്‍വര്‍ധനവാണ് ഉണ്ടാകുന്നത്. ഓഗസ്റ്റ് 23 മുതല്‍ ഒക്ടോബര്‍ മൂന്ന് വരെ 1.20 ലക്ഷം സഞ്ചാരികളാണ് ഊട്ടി ബൊട്ടാണിക്കല്‍ ഗാര്‍ഡനില്‍ മാത്രം സന്ദര്‍ശനം നടത്തിയത്. മുതുമല, ബോട്ട് ഹൗസ്, റോസ് ഗാര്‍ഡന്‍, സിംസ് പാര്‍ക്ക് തുടങ്ങിയ ഭാഗങ്ങളിലും സഞ്ചാരികള്‍ ധാരാളമായി എത്തുന്നുണ്ട്. കൊവിഡ് വ്യാപനം വരുത്തിവെച്ച പ്രതിസന്ധികള്‍ മറികടക്കാന്‍ വിനോദസഞ്ചാരികളുടെ വരവ് ഉപകരിക്കുമെന്നാണ് പൊതുവെ വിലയിരുത്തപ്പെടുന്നത്.

Related Articles

stay connected

3,300FansLike
800FollowersFollow
17,100SubscribersSubscribe
- Advertisement -spot_img

Latest Articles