26.9 C
Kollam
Monday, July 26, 2021
spot_img

ഇത്തവണയും വിദേശികള്‍ക്ക് ഹജ്ജില്ല; സൗദിയിലുള്ള 60,000 പേര്‍ക്ക് മാത്രം അനുമതി

റിയാദ്: ലോകത്തെമ്പാടുമുള്ള വിശ്വാസികള്‍ക്ക് ഇത്തവണയും ഹജ്ജ് തീര്‍ഥാടനം സാധ്യമാവില്ല. സൗദി പൗരന്‍മാരും നിലവില്‍ സൗദിയിലുള്ള വിദേശികളും ഉൾപ്പെടെ 60,000 പേർക്കാണ് അനുമതി നൽകുക.കൊവിഡ് വ്യാപനത്തിന്റെ പശ്ചാത്തലത്തില്‍ കഴിഞ്ഞ വര്‍ഷത്തെ പോലെ തന്നെ ഈ വര്‍ഷവും വിദേശ രാജ്യങ്ങളില്‍ നിന്നുള്ളവര്‍ക്ക് ഹജ്ജ് തീര്‍ത്ഥാടനത്തിന് അനുമതി നല്‍കേണ്ടെന്ന് സൗദി ഭരണകൂടം തീരുമാനിച്ചതായി സൗദി വാര്‍ത്താ ഏജന്‍സി റിപ്പോര്‍ട്ട് ചെയ്തു.അതേസമയം, സൗദിയിലുള്ള 60,000 പേര്‍ക്ക് ഹജ്ജ് തീര്‍ഥാടനം നിര്‍വഹിക്കാന്‍ ഇത്തവണ അനുമതി നല്‍കുമെന്ന് സൗദി ഹജ്ജ്, ആരോഗ്യ മന്ത്രിമാര്‍ അറിയിച്ചു. സൗദി പൗരന്‍മാരും നിലവില്‍ സൗദിയിലുള്ള വിദേശികളും ഉള്‍പ്പെടെയാണിത്. സൗദിയിലെയും ലോകത്തിന്റെ വിവിധ ഭാഗങ്ങളിലെയും കൊവിഡ് വ്യാപനത്തിന്റെ സ്ഥിതി വിശദമായി വിലയിരുത്തിയ ശേഷമാണ് വിദേശത്തു നിന്നു വരുന്നവര്‍ക്ക് ഹജ്ജിന് അനുമതി നല്‍കേണ്ടെന്ന തീരുമാനം കൈക്കൊണ്ടതെന്ന് മന്ത്രിമാര്‍ പറഞ്ഞു. രാജ്യത്തെ ജനങ്ങളുടെയും തീര്‍ഥാടനത്തിന് എത്തുന്നവരുടെയും ആരോഗ്യ സുരക്ഷ പരിഗണിച്ചാണിത്. നിലവിലെ സാഹചര്യത്തില്‍ വിദേശത്തു നിന്നുള്ളവര്‍ക്ക് തീര്‍ഥാടനത്തിന് അനുമതി നല്‍കുന്നത് രോഗവ്യാപനത്തിന് കാരണമാവുമെന്ന വിലയിരുത്തലിന്റെ അടിസ്ഥാനത്തിലാണ് തീരുമാനമെന്നും മന്ത്രിമാര്‍ അറിയിച്ചു.ആഭ്യന്തര തീര്‍ത്ഥാടകര്‍ മാറാവ്യാധികള്‍ ഇല്ലാത്തവരും 18നും 65നും ഇടയില്‍ പ്രായമുള്ളവരും ആയിരിക്കണമെന്ന് നിബന്ധനയുണ്ട്. രണ്ട് ഡോസ് വാക്സിനെടുത്തവര്‍ക്ക് മാത്രമായിരിക്കും അനുമതി. അല്ലാത്ത പക്ഷം തീര്‍ഥാടകര്‍ നിശ്ചിത സമയത്തിനുള്ളില്‍ കൊവിഡ് മുക്തി നേടിയവരായിരിക്കണം. തവക്കല്‍നാ ആപ്പിലൂടെ മുന്‍കൂട്ടി രജിസ്റ്റര്‍ ചെയ്തവര്‍ക്കു മാത്രമായിരിക്കും അനുമതി. ഇതുമായി ബന്ധപ്പെട്ട കൂടുതല്‍ വിവരങ്ങള്‍ ഉടന്‍ പുറത്തിറക്കുമെന്നും അധികൃതര്‍ അറിയിച്ചു. ഇത്തവണ പരിമിതമായ തോതില്‍ വിദേശത്ത് നിന്നുള്ള തീർത്ഥാടകരെ അനുവദിക്കുമെന്ന് നേരത്തേ വാര്‍ത്തയുണ്ടായിരുന്നു. എന്നാല്‍, ജനിതകമാറ്റം സംഭവിച്ച കൊവിഡ് വൈറസിന്റെ വ്യാപനം ലോകത്തിന്റെ വിവിധ ഭാഗങ്ങളില്‍ റിപ്പോര്‍ട്ട് ചെയ്യപ്പെട്ട സാഹചര്യത്തില്‍ കൂടുതല്‍ ജാഗ്രത പാലിക്കുന്നതിന്റെ ഭാഗമായി തീരുമാനം മാറ്റുകയായിരുന്നുവെന്നാണ് റിപ്പോര്‍ട്ട്. കഴിഞ്ഞ വര്‍ഷവും ഹജ്ജിന് വിദേശ തീര്‍ത്ഥാടകരെ അനുവദിച്ചിരുന്നില്ല. കൊവിഡ് വ്യാപനത്തിന്റെ പ്രാരംഭ ഘട്ടത്തില്‍ 2020ല്‍ നടന്ന ഹജ്ജ് തീര്‍ഥാടനത്തിന് 1000 പേര്‍ക്ക് മാത്രമായിരുന്നു അവസരം നല്‍കിയിരുന്നത്.

Related Articles

LEAVE A REPLY

Please enter your comment!
Please enter your name here

Stay Connected

22,036FansLike
2,870FollowersFollow
18,100SubscribersSubscribe
- Advertisement -spot_img

Latest Articles