26.9 C
Kollam
Monday, July 26, 2021
spot_img

അർജുൻ ആയങ്കിയെ തള്ളിപറഞ്ഞു ഭാര്യ മുതൽ ചങ്കായ സുഹൃത്ത് വരെ

കണ്ണൂർ: ഒടുവിൽ കരിപ്പൂര്‍ സ്വര്‍ണക്കടത്ത് കേസില്‍ അര്‍ജുന്‍ ആയങ്കി മാത്രം പ്രതിസ്ഥാനത്ത് ഒറ്റപ്പെട്ടു. സ്വന്തം ഭാര്യയും ചങ്കായ സുഹൃത്തും ഏറ്റവും ഒടുവിൽ ക്വട്ടേഷൻ ഗുരുക്കന്മാരും പാതിരാക്കോഴി കൂവുന്നതിനിടെ തള്ളിപ്പറഞ്ഞതോടെയാണ് കസ്റ്റംസ് വിരിച്ച സ്വർണ വലയിൽ അർജുൻ ആയങ്കി ഒറ്റയ്ക്കു കിടന്ന് പിടക്കുന്നത്. ‘ചിരിക്കുമ്പോൾ കൂടെ ചിരിക്കാൻ ഒരായിരം പേർ’ എന്ന പഴയ സിനിമാ പാട്ടു പോലെ തൻ്റെ സുവർണ കാലത്ത് അർജുൻ ആയങ്കിയുടെ എല്ലാവിധ സൗഭാഗ്യങ്ങളും അനുഭവിച്ചവരാണ് ഇപ്പോൾ തള്ളിപ്പറഞ്ഞത്. ആദ്യം സൈബർ പോരാളിയായും റെഡ് വളണ്ടിയറായും ഏറെ വിയർപ്പൊഴുക്കിയ പാർട്ടി തന്നെ അർജുനെ തള്ളിപ്പറഞ്ഞിരുന്നു. സ്വർണക്കടത്ത് കേസിൽ പിടിക്കപ്പെട്ടപ്പോൾ പണ്ടേ പുറത്താക്കിയതാ ണെന്നായിരുന്നു പാർട്ടി നേതാക്കളുടെ പ്രസ്താവന. ഒരു രാഷ്ട്രീയ പ്രസ്ഥാനത്തിനു മുഖം രക്ഷിക്കാൻ അങ്ങനെ മാത്രമേ സ്വർണക്കടത്ത്-ക്വട്ടേഷൻ വിവാദം കത്തിനിൽക്കുമ്പോൾ പറയാൻ കഴിയുമായിരുന്നു വെങ്കിലും ആയങ്കിയുടെ ഇടനെഞ്ചു നോക്കിയുള്ള ചവിട്ടായിരുന്നു അത്. ഇതിൻ്റെ ആഘാതത്തിൽ കണ്ണിൽ നിന്നും പൊന്നീച്ച പാറി നിൽക്കുമ്പോഴാണ് ചങ്ക് ബ്രോയും ഡിവൈഎഫ്ഐ നേതാവുമായ സി സജീഷും അവൻ്റെ പോക്കത്ര ശരിയല്ലെന്നു കസ്റ്റംസിനോട് തുറന്നടിച്ചത്. സ്വന്തം റിസ്കിൽ ബാങ്ക് വായ്പയെടുത്ത് കാർ പോലും വാങ്ങി കൊടുത്ത ഒക്ക ചങ്ങാതിയും ആയങ്കിയെ സ്വന്തം തടി രക്ഷിക്കാൻ കൈവിട്ടു. പിന്നീട് തള്ളിപ്പറയലുകാരുടെ ഒരു ഘോഷയാത്ര തന്നെയായിരുന്നു.


ക്വട്ടേഷൻ പണിയുടെ ഗുരുസ്ഥാനത്ത് നിർത്തിയിരുന്ന ടി പി വധക്കേസിലെ പ്രതിയും അർജുനെ വെറും ഫേസ്ബുക്ക് ഫ്രണ്ടാക്കി മാത്രം ഒതുക്കി. സ്വർണക്കടത്ത് കേസിലെ കസ്റ്റംസ് പിടിയിൽ നിന്നും നൈസായി തടിയൂരാൻ ഷാഫിയുടെ സൂത്ര പണികളിലൊന്നായിരുന്നു അതെന്നാണ് സൂചന. ഇതിനു നിഴലുപോലെ നിന്നിരുന്ന സുഹൃത്തും ശിഷ്യനുമായ തെക്കെ പാനൂരിലെ അജ്മലും അർജുൻ്റെ പോക്കത്ര ശരിയല്ലെന്നും കടത്ത് സ്വർണം പൊട്ടിക്കാൻ പോകരുതെന്ന് പലവട്ടം മുന്നറിയിപ്പു നൽകിയതായും കസ്റ്റംസിനു മൊഴി നൽകി. എന്നാൽ അർജുനെ തള്ളിപ്പറഞ്ഞതുകൊണ്ടു മാത്രം അജ്മലിന് രക്ഷപ്പെടാനാവുമായിരുന്നില്ല. ഡിജിറ്റൽ തെളിവുകൾ കസ്റ്റംസിൻ്റെ കൈയ്യിലുള്ളതുകൊണ്ട് അജ്മലിനും അകത്ത് കിടക്കേണ്ടി വന്നു.


താനും ഭാര്യ അമലയും തമ്മിലുള്ള വിവാഹ ഫോട്ടോകളിലൊന്നിൽ തൻ്റെ ഹൃദയത്തിലേക്ക് നോക്കുന്നവളാണ് ഭാര്യയെന്ന അടിക്കുറിപ്പോടെയാണ് അർജുൻ ഫേസ്ബുക്കിൽ പോസ്റ്റു ചെയ്തിട്ടുള്ളത്. എന്നാൽ അർജുൻ്റെ കള്ളത്തരങ്ങൾ മുഴുവൻ കസ്റ്റംസിനു വ്യക്തമായത് രണ്ടു തവണ അവരെ ചോദ്യം ചെയ്തപ്പോഴാണ്. അർജുന് ചില തെറ്റായ രീതിയിൽ പണമുണ്ടാക്കുന്നവരുമായി ബന്ധമുണ്ടെന്ന് താനറിഞ്ഞത് വൈകിയാണെന്നും താനും അർജുൻ്റെ സുഹൃത്തുക്കളും പല തവണ ഇതിൽ നിന്നും പിന്മാറണമെന്ന് പറഞ്ഞതായുമാണ് അമല കസ്റ്റംസിന് മൊഴി നൽകിയത്. എന്നാൽ അർജുൻ്റെ സാമ്പത്തിക ഇടപാടുകൾ താനാണ് നോക്കിയിരുന്നുവെന്ന് സമ്മതിക്കേണ്ടി വന്ന അമല അതു ഏതു വഴിയാണ് വന്നതെന്ന കാര്യം അറിയില്ലെന്നാണ് മൊഴി നൽകിയത്. എന്തു തന്നെയായാലും സഹധർമ്മിണിയുടെ വെളിപ്പെടുത്തലുകൾ അർജുൻ ആയങ്കിക്ക് കുടുക്കായിരിക്കുകയാണ്. അർജുൻ ആയങ്കിയുടെ മനസിൽ ചെഗുവേരയെക്കാൾ വലിയ സ്ഥാനമുണ്ടായിരുന്നു ആകാശ് തില്ലങ്കേരിയെന്ന ‘ചുവന്ന നക്ഷത്ര’ത്തിന്. ചങ്കുറപ്പുള്ള ആകാശ് തില്ലങ്കേരിയുടെ ബലത്തിലായിരുന്നു ആയങ്കിയുടെ സ്വർണക്കടത്തെന്നായിരുന്നു പുറത്തുവന്ന റിപ്പോർട്ടുകൾ. എന്നാൽ ഇപ്പോൾ ആകാശ് തില്ലങ്കേരിയും തൻ്റെ പ്രിയ സുഹൃത്തിനെ തള്ളിപ്പറഞ്ഞിരിക്കുകയാണ്. അര്‍ജുന്റെ സ്വര്‍ണക്കടത്ത് ബന്ധങ്ങള്‍ താൻ അറിഞ്ഞത് അവസാന ഘട്ടത്തിലാണെന്നും പാര്‍ട്ടിക്കാരന്‍ എന്ന വെറും സൗഹൃദമാണ് അര്‍ജുന്‍ ആയങ്കിയുമായി ഉള്ളതെന്നുമായിരുന്നു ആകാശിന്റെ മൊഴി. തന്റെ പേര് ഉപയോഗപ്പെടുത്തി അര്‍ജുന്‍ ആളുകളെ ഭീഷണിപ്പെടുത്തിയിരുന്നതായി വിവരം ലഭിച്ചത് അര്‍ജുന്‍ പിടിയിലായ ശേഷം മാത്രമാണെന്നും ആകാശ് കസ്റ്റംസിന് മൊഴി നല്‍കി. തനിക്ക് സ്വര്‍ണക്കടത്തുമായി ഒരു ബന്ധവും ഇല്ലെന്നും ആകാശ് തില്ലങ്കേരിയുടെ മൊഴിയില്‍ പറയുന്നു.

അതേസമയം ആകാശ് തില്ലങ്കേരിയെ കഴിഞ്ഞ ദിവസം 12 മണിക്കൂര്‍ ചോദ്യം ചെയ്ത ശേഷമാണ് കസ്റ്റംസ് വിട്ടയച്ചത്. രാവിലെ 11ന് തുടങ്ങിയ ചോദ്യം ചെയ്യല്‍ രാത്രി 11 വരെ നീണ്ടു. അര്‍ജുന്‍ ആയങ്കിയുടെയും ടി പി വധക്കേസ് കുറ്റവാളി മുഹമ്മദ് ഷാഫിയുടെയും മൊഴികളുടെ അടിസ്ഥാനത്തിലാണ് ആകാശ് തില്ലങ്കേരിയെ ചോദ്യം ചെയ്തത്. ഇരുവരുടെയും മൊഴികളില്‍ സ്വര്‍ണകള്ളക്കടത്തിനെ സംബന്ധിച്ച് ആകാശ് തില്ലങ്കേരിക്ക് അറിവുണ്ടായിരുന്നെന്ന സൂചനയാണ് കിട്ടിയത്. ഇതിന്റെ വിശദാംശങ്ങളാണ് കസ്റ്റംസ് ഇയാളില്‍ നിന്ന് ചോദിച്ചറിഞ്ഞത്. ആകാശിന്റെ മൊഴിയും, ഫോണ്‍കോള്‍ രേഖകളും വിശദമായി പരിശോധിച്ച ശേഷം ആവശ്യമെങ്കില്‍ വീണ്ടും വിളിപ്പിച്ചേക്കുമെന്നും കസ്റ്റംസ് വൃത്തങ്ങള്‍ അറിയിച്ചിട്ടുണ്ട്. അർജുനെ തള്ളിപ്പറഞ്ഞവരെ താൽക്കാലികമായി വിട്ടയച്ചത് മാത്രമാണെന്നും അന്വേഷണത്തിൻ്റെ അന്തിമഘട്ടത്തിൽ പലരും കുടുങ്ങിയേക്കുമെന്ന വ്യക്തമായ സൂചനയാണ് കസ്റ്റംസ് നൽകുന്നത്.

Related Articles

stay connected

1,820FansLike
53FollowersFollow
1,840SubscribersSubscribe
- Advertisement -spot_img
- Advertisement -spot_img

Latest Articles